एमबिएस प्रश्नपत्र बाहिरिएको घटनामा केही व्यक्ति पक्राउ, तीन सदस्यीय छानबिन समिति गठन

काठमाडौँ: त्रिभुवन विश्वविद्यालय व्यवस्थापन सङ्काय अन्तर्गत ‘मास्टर्स अफ बिजनेस स्टडिज’ (एमबिएस) को प्रश्नपत्र सार्वजनिक गरेको आरोपमा केही व्यक्ति पक्राउ परेका छन्। शिक्षा तथा खेलकुदमन्त्री सस्मित पोखरेलको निर्देशनमा आज बिहान उनीहरूलाई नियन्त्रणमा लिइएको हो।'

नेपाल प्रहरीको केन्द्रीय अनुसन्धान ब्यूरो (सिआइबी) ले नियन्त्रणमा लिइएका व्यक्तिहरूमाथि अनुसन्धान सुरु गरिसकेको छ। यही साउन ८ गते सञ्चालित स्नातकोत्तर तहको ‘अर्गनाइजेसनल बिहेबियर’ विषयको परीक्षा सुरु भएको केही मिनेटमै प्रश्नपत्र सामाजिक सञ्जालमा भाइरल भएको थियो।

प्रश्नपत्र बाहिरिएपछि त्रिभुवन विश्वविद्यालयको व्यवस्थापन सङ्काय डिनको कार्यालयले दोषीमाथि कारबाहीका लागि ‘साइबर ब्यूरो’लाई पत्राचार गरेको थियो।

यसैबिच, परीक्षा नियन्त्रण महाशाखाले घटनाको निष्पक्ष छानबिन गर्न प्रा. डा. अच्युत ज्ञवालीको संयोजकत्वमा तीन सदस्यीय समिति गठन गरेको छ। समितिका अन्य सदस्यहरूमा अनुगमन निर्देशनालयका उपनिर्देशक सहप्राध्यापक पुष्कर रैखला र केन्द्रीय परीक्षा सञ्चालक समितिका सदस्य सहप्राध्यापक महेशराज ओझा रहनुभएको छ।

उक्त समितिलाई सात कार्यदिनभित्र प्रतिवेदन बुझाउने कार्यादेश (TOR) दिइएको छ।