मुटु बचाऔँ, जीवन जोगाऔँ: मारुती सिमेन्ट्सद्वारा देशभर सिपिआर तालिम सञ्चालन गर्न सामाग्री सहयोग

काठमाण्डौ, ०७ श्रावण । हालको बदलिँदो र व्यस्त जीवनशैली, बढ्दो मानसिक तनाव तथा अव्यवस्थित खानपानका कारण विशेषगरी युवापुस्तामा हृदयसम्बन्धी आकस्मिक समस्याहरू एउटा गम्भीर चुनौतीका रूपमा देखा परिरहेका छन् । यस्तो संवेदनशील अवस्थामा तत्काल प्राथमिक उपचार नपाउँदा अकालमै ज्यान गुमाउनुपर्ने जोखिमलाई मध्यनजर गर्दै मारुती सिमेन्ट्स लिमिटेडले एक सराहनीय कदम चालेको छ ।

सामाजिक उत्तरदायित्व लाई प्राथमिकतामा राख्दै मारुती सिमेन्ट्सले देशभर सिपिआर (कार्डियोपल्मोनरी रिससिटेसन) तालिम सञ्चालन गर्ने उद्देश्य बोकेको 'जयन्ती मेमोरियल ट्रस्ट' लाई आवश्यक तालिम सामाग्रीहरू हस्तान्तरण गरेको छ ।  काठमाडौँमा आयोजित एक विशेष कार्यक्रममा दुवै संस्थाका सञ्चालकहरूको उपस्थितिमा उक्त सामाग्रीहरू हस्तान्तरण गरिएको हो ।

मारुती सिमेन्ट्सले समाजप्रतिको आफ्नो जिम्मेवारीलाई आत्मसात् गर्दै यो सानो प्रयासले धेरैको जीवन रक्षामा ठुलो सहयोग पुग्ने विश्वास व्यक्त गरेको छ । "हामी केवल निर्माणमा मात्र होइन, समाजको सुरक्षा र स्वास्थ्यमा पनि उत्तिकै गम्भीर छौँ," कम्पनीले जारी गरेको विज्ञप्तिमा उल्लेख छ ।

जयन्ती मेमोरियल ट्रस्टले प्राप्त सामाग्रीहरूको उच्चतम प्रयोग गरी देशभरि नै सिपिआर तालिम अभियान सञ्चालन गर्ने लक्ष्य राखेको छ । आकस्मिक अवस्थामा मुटुको धड्कन रोकिएका व्यक्तिलाई अस्पताल पुर्‍याउनु अघि दिइने सिपिआर विधिको बारेमा जनमानसलाई साक्षर बनाउन सके धेरैको ज्यान जोगाउन सकिने ट्रस्टको ठम्याई छ ।

यस सहकार्यले समाजमा प्राथमिक स्वास्थ्य शिक्षाको महत्त्वलाई उजागर गर्नुका साथै अन्य निजी क्षेत्रलाई पनि सामाजिक सेवामा लाग्न प्रेरणा दिने विश्वास लिइएको छ । मारुती सिमेन्ट्स र जयन्ती मेमोरियल ट्रस्टको यो संयुक्त पहलले जनस्तरमा स्वास्थ्य सुरक्षाको नयाँ लहर ल्याउने अपेक्षा गरिएको छ ।