आज र भोलि यी जिल्लामा आकस्मिक बाढीको जोखिम

काठमाण्डौ, ०३ श्रावण । जल तथा मौसम विज्ञान विभागअन्तर्गत बाढी पूर्वानुमान महाशाखाले आगामी तीन दिनका लागि नदी तथा खोलामा बहाव बढ्ने पूर्वानुमान गर्दै विशेष सतर्कता अपनाउन आग्रह गरेको छ । महाशाखाले ठूला नदीहरू हाल सतर्कता तहभन्दा तल रहे पनि धेरै नदीमा बहाव उल्लेख्य रूपमा बढ्ने सम्भावना रहेको जनाएको छ ।

महाशाखाका अनुसार कोशी, नारायणी, कर्णाली, महाकाली तथा तिनका सहायक नदी, साथै कन्काई, कमला, बबई, पूर्व राप्ती, पश्चिम राप्तीलगायत नदीहरूमा आगामी तीन दिनसम्म पानीको बहाव बढ्ने अनुमान गरिएको छ । यद्यपि यी नदीको जलस्तर सतर्कता तहभन्दा तल नै रहने जनाइएको छ ।

आज झापा, मोरङ, सुनसरी, इलाम, पाँचथर, तेह्रथुम, दोलखा, सिन्धुपाल्चोक, काभ्रेपलाञ्चोक, काठमाडौँ, भक्तपुर, ललितपुर, धादिङ, मकवानपुर, चितवन, कास्की, तनहुँ, स्याङ्जा, पर्वत, बागलुङ, गुल्मी, पाल्पा, अर्घाखाँची, प्युठान, नवलपरासी पूर्व, नवलपरासी पश्चिम, रुपन्देही, कपिलवस्तु, दाङ, बाँके, बर्दिया, डोटी, डडेलधुरा, कैलाली र कञ्चनपुर तथा आसपासका जिल्लाबाट बग्ने साना नदी र खोलामा बहाव उल्लेख्य रूपमा बढ्ने तथा आकस्मिक बाढीको मध्यम जोखिम रहने चेतावनी दिइएको छ ।

त्यसैगरी. सोमवार र मङ्गलवार पनि कोशी, गण्डकी, लुम्बिनी र सुदूरपश्चिम प्रदेशका केही साना नदी तथा खोलामा बहाव अचानक बढ्न सक्ने पूर्वानुमान गरिएको छ ।

महाशाखाले नदी किनार, होचा भूभाग तथा बाढीको जोखिम भएका क्षेत्रमा बसोबास गर्ने नागरिकलाई सतर्क रहन, अनावश्यक रूपमा नदी तर्न वा नदी किनारमा नजान तथा स्थानीय प्रशासन र सम्बन्धित निकायले जारी गर्ने सूचनाको पालना गर्न अनुरोध गरेको छ।