विश्वकपमा रोमाञ्चक बन्दै गोल्डेन बुटको प्रतिष्पर्धा

काठमाडौँ: जारी फिफा विश्वकपमा गोल्डेन बुटको प्रतिस्पर्धा निकै रोमाञ्चक बनेको छ ।

दुई खेलपछि अर्जेन्टिनाका कप्तान लियोनेल मेसी पाँच गोलसहित शीर्ष स्थानमा छन् भने फ्रान्सका किलियन एम्बाप्पे र नर्वेका एर्लिङ हालान्ड समान चार-चार गोलसहित पछ्याइरहेका छन् । विश्वकप इतिहासमा दुई खेलपछि तीन खेलाडीले चार वा सोभन्दा बढी गोल गरेको यो दोस्रो पटक हो । यसअघि सन् १९५४ मा मात्रै यस्तो भएको थियो ।

मेसीले अस्ट्रियाविरुद्ध दुई गोल गर्दै विश्वकप इतिहासकै सर्वाधिक गोलकर्ताको कीर्तिमान आफ्नो नाममा लेखाएका थिए । त्यसपछि फ्रान्सले इराकलाई हराएको खेलमा आफ्नो एक सयौँ अन्तर्राष्ट्रिय खेल खेलिरहेका एम्बाप्पेले पनि दुई गोल गरे । त्यसको केही समयपछि हालान्डले सेनेगलविरुद्ध दुई गोल गर्दै नर्वेलाई अन्तिम ३२ मा पुर्‍याए । विश्वकप यात्राको सुरुआतमै उनले प्रभावशाली प्रदर्शन गरेका छन् ।

यी तीन स्टार खेलाडीबीच अहिले एकले गरेको उपलब्धिलाई अर्कोले अझ माथि पुर्‍याउने प्रतिस्पर्धा चलिरहेको देखिन्छ । यसैबीच इङल्याण्डका ह्यारी केनसँग पनि घानाविरुद्धको खेलमा आफ्नो गोल संख्या बढाउने अवसर छ । विश्व फुटबलका उत्कृष्ट खेलाडीहरूले लगातार कीर्तिमान बनाइरहेका कारण यसपटकको विश्वकप विशेष बन्ने संकेत देखिएको छ ।

प्रतियोगिता सुरु हुँदा जर्मनीका मिरोस्लाभ क्लोजे १६ गोलसहित विश्वकप इतिहासका सर्वाधिक गोलकर्ता थिए । तर अहिले ३८ वर्षीय मेसी २८ खेलमा १८ गोलसहित शीर्ष स्थानमा पुगेका छन् । उनले यस संस्करणमा अर्जेन्टिनाले गरेका सबै पाँच गोल गरेका छन् । यद्यपि एम्बाप्पे धेरै पछि छैनन् । उनले १६ खेलमा १६ गोल गर्दै क्लोजेको बराबरी गरेका छन् । उनी एकभन्दा बढी पटक गोल्डेन बुट जित्ने पहिलो खेलाडी बन्ने लक्ष्यमा छन् ।

नर्वेका २५ वर्षीय हालान्डले पनि नयाँ इतिहास बनाइरहेका छन् । उनले विश्वकपका आफ्नो पहिलो दुई खेलमै दुई-दुई गोल गर्ने छैटौँ खेलाडी बन्न सफल भएका छन् । उनले नर्वेका लागि ५२ खेलमा ५९ गोल गरिसकेका छन् ।

त्यस्तै यस विश्वकपमा धेरै कीर्तिमानहरू भत्किएका छन् । एम्बाप्पे फ्रान्सका सर्वाधिक गोलकर्ता बनेका छन् । हालान्ड दुई खेलमै नर्वेका विश्वकप इतिहासका शीर्ष गोलकर्ता बनेका छन् भने केनले इङ्ग्ल्यान्डका लागि ग्यारी लिनेकरको विश्वकप गोल कीर्तिमान बराबरी गरेका छन् ।

यी सबै खेलाडीको लक्ष्य भने सन् १९५८ मा फ्रान्सका जस्ट फोन्टेनले बनाएको एकै संस्करणमा १३ गोलको कीर्तिमान तोड्नु रहेको छ । अहिलेसम्म एकै विश्वकपमा १० वा सोभन्दा बढी गोल गर्ने खेलाडी तीन जना मात्र छन् । उनीहरू जस्ट फोन्टेन, जर्मनीका गेर्ड मुलर र हंगेरीका सान्डोर कोचिस हुन् ।

४८ टोलीको नयाँ ढाँचाले पनि गोलको सम्भावना बढाएको छ । कम स्तरका टोली थपिँदा विश्वका उत्कृष्ट आक्रमणकारी खेलाडीहरूले बढी अवसर पाइरहेका छन् । साथै उपाधि जित्ने टोलीले अघिल्ला संस्करणभन्दा एक चरण बढी खेल्नुपर्ने भएकाले गोल संख्या अझ बढ्ने सम्भावना देखिएको छ ।

विश्वकपको यो संस्करणमा गोल्डेन बुटको प्रतिस्पर्धा अहिले नै ऐतिहासिक बन्न थालेको छ । अब अन्त्यमा सबैभन्दा माथि को पुग्छ भन्ने प्रश्नले विश्व फुटबल समर्थकहरूको उत्सुकता झन् बढाएको छ ।