बोधि संवाद २०२६ आयोजना हुने, ४० भन्दा बढी स्वदेशी तथा विदेशी बौद्धिक व्यक्तित्व सहभागी हुँदै

सेन्टर फर सोसल इनोभेसन एन्ड फरेन पोलिसी (CESIF) ले आगामी असार २–५ (१६–१९ जुन २०२६) सम्म काठमाडौंमा बोधि संवाद २०२६ आयोजना गर्ने भएको छ। “प्रबुद्ध संवाद” (Enlightened Dialogue) को अवधारणामा आधारित यस चारदिने अन्तर्राष्ट्रिय नीति संवाद कार्यक्रममा नेपाल तथा विदेशका नीति निर्माता, विद्वान्, अनुसन्धानकर्ता, अर्थशास्त्री, रणनीतिक विश्लेषक तथा युवा नेतृत्वहरू सहभागी हुनेछन्।

आयोजकका अनुसार यस वर्षको बोधि संवाद दुई प्रमुख विषयमा केन्द्रित रहनेछ – “नेपालको आर्थिक सम्भावनाको उद्घाटन” र “दक्षिण एशियामा बदलिँदो भूराजनीतिक परिदृश्यको विश्लेषण”। कार्यक्रममा सुशासन, लगानी, रोजगारी सिर्जना, आर्थिक रूपान्तरण, क्षेत्रीय सुरक्षा, रणनीतिक प्रतिस्पर्धा, डिजिटल सार्वभौमिकता तथा तीव्र रूपमा परिवर्तन भइरहेको भूराजनीतिक परिवेशमा नेपालको भूमिकालगायतका विषयमा गहन छलफल हुनेछ।

कार्यक्रमबारे जानकारी दिँदै CESIF का कार्यकारी अध्यक्ष विजयकान्त कर्णले बोधि संवाद २०२६ मा ४० भन्दा बढी नेपाली तथा अन्तर्राष्ट्रिय बौद्धिक व्यक्तित्व, नीति विज्ञ, अनुसन्धानकर्ता र विशेषज्ञहरू सहभागी हुने बताए।

“बोधि संवाद २०२६ ले ४० भन्दा बढी नेपाली तथा अन्तर्राष्ट्रिय बौद्धिक व्यक्तित्वहरूलाई एकै मञ्चमा ल्याउनेछ। उनीहरूले आर्थिक रूपान्तरणदेखि भूराजनीतिक परिवर्तनसम्मका विषयमा गहन विमर्श गर्नेछन्। यस संवादको उद्देश्य नेपाल लागि व्यावहारिक नीति सुझावहरू विकास गर्नुका साथै ज्ञान र अनुभवको आदानप्रदानलाई प्रवर्द्धन गर्नु हो,” कर्णले भने।

नेपाल तथा विदेशका प्रतिष्ठित वक्ता र विशेषज्ञहरूको सहभागिता रहने अपेक्षा गरिएको यस मञ्चले स्थानीय अनुभव र विश्वव्यापी दृष्टिकोणबीच सेतु निर्माण गर्दै प्रमाणमा आधारित नीतिनिर्माणलाई प्रवर्द्धन गर्ने विश्वास आयोजकले लिएको छ।