चोरी भएका ४० दुई पाङ्ग्रे सवारीसाधन सम्बन्धित धनीलाई फिर्ता

काठमाडौँ: काठमाडौँ उपत्यकामा विभिन्न स्थान र मितिमा चोरी भएका ४० वटा दुई पाङ्ग्रे सवारीसाधन (मोटरसाइकल र स्कुटर) सम्बन्धित धनीलाई फिर्ता गरिएको छ ।

काठमाडौँ उपत्यका ट्राफिक प्रहरी कार्यालयले बुधबार आयोजना गरेको कार्यक्रममा ती सवारीसाधन हस्तान्तरण गरिएको हो । कार्यालय प्रमुख प्रहरी वरिष्ठ उपरीक्षक नवराज अधिकारीले २५ वटा मोटरसाइकल र १५ वटा स्कुटर सम्बन्धित धनीलाई बुझाएका हुन् ।

प्रहरीका अनुसार निवेदन र विभिन्न सूचनाका आधारमा खोजी गर्दा ती सवारीसाधन उपत्यकाका विभिन्न स्थानबाट फेला पारिएको हो । केही सवारीसाधनमा वास्तविक नम्बर प्लेट प्रयोग भएको पाइयो भने केहीमा नक्कली नम्बर प्लेट राखिएको अवस्था समेत भेटिएको थियो ।

खोजतलासका क्रममा सिम्ले, गुर्जुधारा, धर्मस्थली, नयाँबसपार्क, जम्बुडाँडा, सातदोबाटो, काँडाघारी, बानेश्वर, जोरपाटी, गोकर्ण, कीर्तिपुर, सुकेधारा, चुनदेवी, नैकाप, सुन्दरीजल, बौद्ध, जयबागेश्वरी लगायतका क्षेत्रबाट ती सवारीसाधन फेला परेका थिए ।

गत साउनयता मात्रै ट्राफिक प्रहरीले ५०२ वटा सवारीसाधन सम्बन्धित धनीलाई फिर्ता गरिसकेको जनाएको छ । चोरीमा संलग्न केही व्यक्तिहरूलाई समेत नियन्त्रणमा लिएर आवश्यक अनुसन्धानका लागि सम्बन्धित प्रहरी कार्यालयमा पठाइएको छ । सवारीसाधन फिर्ता पाएपछि धनीहरूले खुसी व्यक्त गर्दै ट्राफिक प्रहरीलाई धन्यवाद दिएका छन् ।

ट्राफिक प्रहरीले सवारीसाधन चोरी रोक्न ह्यान्डल लक, डिस्क लक, अलार्म प्रणाली जडान गर्न र सुरक्षित स्थानमा पार्किङ गर्न आग्रह गरेको छ । साथै सवारी हराएमा हटलाइन १०३ वा १०० मा सम्पर्क गर्न सकिने पनि जनाएको छ ।