नेपाल उद्योग वाणिज्य महासंघका पूर्व अध्यक्ष शेखर गोल्छा पक्राउ

काठमाडौं: नेपाल उद्योग वाणिज्य महासंघका पूर्व अध्यक्ष शेखर गोल्छा पक्राउ परेका छन्। नेपाल प्रहरीको केन्द्रीय अनुसन्धान ब्युरो (सीआईबी) ले बिहीबार उनलाई पक्राउ गरेको हो।

सीआईबीका प्रवक्ता शिवकुमार श्रेष्ठले गोल्छा पक्राउ परेको पुष्टि गर्दै भने, “शेखर गोल्छालाई पक्राउ गरिएको छ। थप विवरण केही बेरमा सार्वजनिक गरिन्छ।” गोल्छा हिमालयन रि–इन्स्योरेन्स लिमिटेडका निवर्तमान अध्यक्ष समेत हुन्।

हाल सम्पत्ति शुद्धीकरण अनुसन्धान विभागको हिरासतमा रहेका दीपक भट्टले गरेको गैरकानूनी धितोपत्र कारोबार प्रकरणमा गोल्छा पनि तानिएका हुन्। प्रारम्भिक जाँचबुझ तथा सुपरिवेक्षण प्रतिवेदनले भट्टलाई गैरकानूनी कार्य गर्न सहयोग गर्ने व्यक्ति तथा संस्थाका रूपमा शेखर गोल्छासहित विभिन्न संस्था र व्यक्तिलाई कारबाहीको दायरामा ल्याउन सिफारिस गरेको थियो।

उक्त प्रतिवेदन अनुसार हिमालयन क्यापसर्व, हिमालय सेक्युरिटिज बैंकर लिमिटेड, एचएलआई लार्ज क्याप फण्ड, नेपाल माइक्रो इन्स्योरेन्स कम्पनी लिमिटेड र रोहित गुप्ता पनि अनुसन्धान तथा कारबाहीको सिफारिसमा परेका छन्।

प्रकरणबारे थप विवरण अनुसन्धानपछि सार्वजनिक गरिने सीआईबीले जनाएको छ।