खानेपानी डिभिजनका तत्कालीन निमित्त इन्जिनियर किशोरप्रसाद यादवविरुद्ध अवैध सम्पत्ति मुद्दा दायर

काठमाडौं: खानेपानी तथा सरसफाइ डिभिजन कार्यालय कलैया, बाराका तत्कालीन निमित्त हाकिम (आठौँ तहका इन्जिनियर) किशोरप्रसाद यादवविरुद्ध अवैध सम्पत्ति आर्जन गरेको अभियोगमा अख्तियार दुरुपयोग अनुसन्धान आयोगले विशेष अदालतमा मुद्दा दायर गरेको छ।

अख्तियारका अनुसार यादवले सार्वजनिक सेवामा प्रवेश गरेको मितिदेखि जाँच अवधिसम्म वैध आयको तुलनामा १ करोड ४६ लाख ८१ हजार २२५ रुपैयाँ बराबरको सम्पत्तिको स्रोत खुलाउन सकेका छैनन्। उनको आय–व्यय २०४७/०३/३१ देखि २०८०/०९/२९ सम्मको अवधिमा जाँच गरिएको हो।

जाँच अवधिमा यादव र उनको परिवारको कुल वैध आय ३ करोड ४६ लाख २१ हजार ४०१ रुपैयाँ रहेको देखिएको छ। तर सोही अवधिमा उनले जग्गा खरिद, घर निर्माण, सेयर खरिद, सवारी साधन, अध्ययनलगायत शीर्षकमा ४ करोड ९३ लाख २ हजार ६२६ रुपैयाँ खर्च गरेको पाइएको छ।

यादवले अवैध रूपमा आर्जन गरेको सम्पत्ति श्रीमती निर्मला कुमारी यादवको नाममा समेत राखेको देखिएकाले उक्त सम्पत्ति जफत गर्ने प्रयोजनका लागि उनलाई पनि प्रतिवादी बनाइएको अख्तियारले जनाएको छ।