निर्वाचन परिणामलाई सम्मानपूर्वक स्वीकार गर्छु- महेश बस्नेत

काठमाण्डौ, २३ फाल्गुण । नेपाल कम्युनिष्ट पार्टी (एमाले) का सचिव महेश बस्नेतले भक्तपुर-२ को प्रतिनिधिसभा निर्वाचन परिणामलाई सम्मानपूर्वक स्वीकार गर्ने बताएका छन् ।

सो क्षेत्रमा एमालेका तर्फबाट उम्मेदवार बनेका बस्नेतले यसपटकको नतिजा आफ्नो पक्षमा नआए पनि लोकतन्त्रमा जनताको निर्णय सर्वोपरि हुने भन्दै त्यसलाई स्वीकार गरेको बताएका हुन् ।

निर्वाचनमा विजयी राष्ट्रिय स्वतन्त्र पार्टीका उम्मेदवार राजिब खत्रीलाई उनले बधाई दिँदै सफल कार्यकालको शुभकामना व्यक्त गरेका छन् ।

बस्नेतले सूर्य चिन्हमा मतदान गरी आफूलाई विश्वास गर्ने सबै मतदाता तथा चुनावी अभियानमा दिनरात खटिएका पार्टीका नेता-कार्यकर्ताप्रति कृतज्ञता व्यक्त गरेका छन् ।

उनले राजनीतिमा हार जित स्वाभाविक प्रक्रिया भएको उल्लेख गर्दै जनताको सेवा गर्ने प्रतिबद्धता भने कहिल्यै कमजोर नहुने बताएका छन् । आगामी दिनमा आफ्नो भूमिका रचनात्मक प्रतिपक्षको हुने उनले स्पष्ट पारेका छन् ।

बस्नेतले शिक्षा, स्वास्थ्य, रोजगारी, भ्रष्टाचारमुक्त सुशासन र समृद्ध समाज निर्माणका लागि सदन बाहिरबाट पनि निरन्तर आवाज उठाइरहने प्रतिबद्धता जनाएका छन् । साथै जनताको विश्वास, माया र साथ नै आफ्नो सबैभन्दा ठूलो शक्ति भएको उल्लेख गर्दै बाँकी जीवन भक्तपुरको विकास र जनताको सेवामा समर्पित रहने बताएका छन् ।

भक्तपुर-२ मा मतगणना अन्तिम चरणमा पुगेको छ र पछिल्लो अपडेट अनुसार बस्नेतले केवल ८ हजार ३५१ मत प्राप्त गरेका छन् । त्यस्तै विजयुन्मुख रहेका रास्वपाका खत्रीले ३४ हजार ७०२ मत प्राप्त गरेका छन् ।