नेपाल वितरक महासंघले १७औँ स्थापना दिवस मनायो

काठमाडौँ, २८ मंसिर । नेपाल वितरक महासंघले आफ्नो १७औँ स्थापना दिवस विविध कार्यक्रम आयोजना गरी मनाएको छ । 

त्रिपुरेश्वरस्थित वर्ल्ड ट्रेड सेन्टरमा आयोजित कार्यक्रममा उत्पादन कम्पनी र वितरक कम्पनीहरूबीच देखिने विभिन्न समस्या समाधानमा महासंघले खेल्दै आएको भूमिकालाई जोड दिइयो ।

कार्यक्रमका प्रमुख अतिथि तथा नेपाल उद्योग वाणिज्य महासंघका प्रतिनिधि रामशरण थपलियाको उपस्थितिमा सम्पन्न सो कार्यक्रमलाई महासंघका अध्यक्ष दुर्गाप्रसाद गौतमले सम्बोधन गरेका थिए । अध्यक्ष गौतमले भने, ''महासंघले मुख्य रूपमा उत्पादक र वितरक कम्पनीहरूबीचको वित्तीय तथा अन्य विविध समस्या समाधान गर्दै आएको छ ।''

उनले महासंघ हाल देशका ४७ जिल्लामा विस्तार भइसकेको जानकारी दिँदै राज्यले अझै पनि वितरक महासंघलाई कानुनी मान्यता र उचित स्थान नदिएकोप्रति गुनासो व्यक्त गरे । साथै, संस्थापन पक्षप्रति कृतज्ञता ज्ञापन गर्दै सोही मार्गदर्शनअनुसार कार्य गर्दै आएको उनले उल्लेख गरे ।

त्यसैगरी, कार्यक्रममा बोल्दै नेपाल डेरी एसोसिएसनका अध्यक्ष प्रल्हाद दाहालले नेपाल वितरक महासंघलाई १७औँ स्थापना दिवसको हार्दिक बधाई तथा शुभकामना व्यक्त गरेका थिए ।

महासंघले वितरक क्षेत्रको हकहित संरक्षण र विकासका लागि निरन्तर प्रयास गर्दै आएको कार्यक्रम प्रस्तोता एवं महासंघका महासचिव शिव खनालले बताएका थिए ।