ललितपुर महानगरको नीति तथा कार्यक्रम र बजेट पारित

काठमाडौं: ललितपुर महानगरपालिकाको आगामी आर्थिक वर्षको नीति तथा कार्यक्रम र बजेट सातौं नगरसभाबाट पारित भएको छ ।

शुक्रबार बसेको नगरसभाले महानगरको नीति तथा कार्यक्रम र बजेट पारित गरेको आज विहान पत्रकार सम्मेलन मार्फत महानगरले जानकारी दिएको हो ।

महानगरेको आगामी आ.व. २०८२÷८३ को नीति तथा कार्यक्रम र बजेटमा ३४ वटा क्षेत्रमा ३८८ वटा नीति रहेका छन् ।
महानगरले आगामी आवका लागि ७ अर्ब ४७ करोड ४१ लाख ४७ हजार बजेट बिनियोजन गरेको छ । जसमा पुँजीगत तर्फको बजेट ४ अर्ब ५० करोड ७७ लाख २९ हजार (६०.३२ प्रतिशत) रहेको छ । प्रशासनिक खर्च १ अर्ब ३३ करोड ३ लाख १८ हजार (१७.७९ प्रतिशत) र सामाजिक सुरक्षा तथा सर्शत अनुदान तर्फ १ अर्ब ६३ करोड ६१ लाख (२१.८९ प्रतिशत) बजेट बिनियोजन गरिएको छ ।

पाटन दरबार स्क्वायर, वुङ्गमति, खोकना, सुनाकोठी, नागदह धापाखेल र हरिसिद्धिलाई समेटेर रणनीतिक सांस्कृतिक सडक को रुपमा घोषणा गर्ने, रिङ्गरोडको कुसुन्तीमा नेपालमै पहिलो लिफ्ट सहितको अपांगतामैत्री आकाशे पुल निर्माण आगामी आ.व. २०८२÷८३ मा सम्पन्न गर्ने गरी महानगरले बजेट व्यवस्था गरेको छ । साथै पाटन अस्पताल अगाडि आकाशे पुल निर्माण सम्पन्न गर्ने बजेटमा उल्ले छ ।

चक्रपथको धोविघाटमा साइकल सहित आवतजावत गर्न सकिने आकाशे पुल निर्माणको लागि बजेट व्यवस्था गरिएको छ । लगनखेल स्थित बसपार्कलाई व्यवस्थित, सूचनामैत्री तथा यात्रुमैत्री बनाउने र महानगरभित्र सम्भावना भएका रुटहरुमा साझा बस सञ्चालनका लागि समन्वय गर्ने जस्ता महानगरका बजेटमा समेटिएका मुख्य बुँदाहरु हुन् ।