सूचना प्रविधिमार्फत नेपालमै संभावना, विदेश जानु नपर्ने

इटहरी  :  सूचना प्रविधिको क्षेत्रमा नेपालमा अपार सम्भावना रहेको भन्दै विशेषज्ञहरू र उद्यमीहरूले नेपाली युवाहरूले अब विदेश जानुपर्ने आवश्यकता नरहेको बताएका छन् ।

शनिबार विराटनगरमा सम्पन्न पहिलो सूचना प्रविधि सम्मेलन (आईटी समीट) मा वक्ताहरूले प्रविधिको माध्यमबाट नेपालमै समृद्धि र रोजगारीको सम्भावना देखिएको बताएका हुन् ।

नेपाल उद्योग परिसंघ युवा उद्यमी मञ्च, कोशी प्रदेशद्वारा आयोजित सम्मेलनको उद्घाटन प्रदेशका मुख्यमन्त्री हिक्मत कुमार कार्कीले गरेका थिए । उनले कोशी प्रदेशमा सूचना प्रविधिको युगको सुरुवात भएको बताउँदै सरकार प्रविधिमैत्री वातावरण निर्माणमा प्रतिबद्ध रहेको जनाए ।

सम्मेलनमा ‘विश्वव्यापी सूचना प्रविधिको प्रवृत्ति र स्थानीय सम्भावना’ विषयक छलफलमा सहभागी क्लाउड फ्याक्ट्रीका देशीय प्रबन्धक प्रशान्त पोखरेलले भविष्य योजनाका निर्माणकर्ताहरूको हुने बताए । ‘भिजन निर्माण गर्न सक्ने व्यक्ति नै सफल बन्ने हो,’ उनले भने ।

सूचना प्रविधिका वकालतकर्ता हेमपाल श्रेष्ठले प्रविधिको अवसरलाई संस्थागत रूपमा अगाडि बढाउनु पर्नेमा जोड दिए । ‘प्रदेश सरकार, स्थानीय निकाय र सामाजिक संस्थाहरूको सहकार्यमा प्रविधिको माध्यमबाट देशको भविष्य उज्यालो बनाउन सकिन्छ,’ श्रेष्ठले भने ।

स्टार्टअप उद्यमी आयुष भगतले प्रविधिको प्रयोगमार्फत नेपालमै रोजगारी सिर्जना गर्न सकिने उदाहरण प्रस्तुत गरे । उनले भने, ‘विदेश गएका केही युवाहरू समेत सम्भावना देखेर नेपाल फर्किरहेका छन् । यदि हामीले अवसर चिने भने रोजगारीका लागि विदेश जानुपर्ने बाध्यता अन्त्य हुन्छ ।’

‘खल्ती एप’ का संस्थापक अमित अग्रवालले नेपालमै बसेर डलर कमाउन सकिने उदाहरण दिएका थिए । ‘अमेरिका गइ डलर कमाउनेभन्दा नेपालमै बसेर डलर कमाउनु अझ अर्थपूर्ण हुन्छ,’ अग्रवालले भने । उनले त्यसका लागि जागरूकता र लगनशीलता आवश्यक रहेको बताए ।

त्यस्तै, ‘उपाय कार्गो’ का सुमन रायमाझी र ‘खालीसिसि’ का संस्थापक अमुन थापाले पनि प्रविधिमार्फत हासिल गरेका सफलताहरूको अनुभव बाँडे ।

माइक्रोसफ्टका प्रमुख प्रविधि विशेषज्ञ समीर थापाले भने, प्रविधि अवसर मात्र नभई चुनौती पनि भएको भन्दै व्यक्तिगत तयारी र कौशल विकासमा जोड दिए ।

सम्मेलनमा ‘कोशी प्रदेशका सूचना प्रविधि अवसरहरू’ विषयमा प्रस्तुति दिँदै दिपेश पोखरेलले जनशक्तिलाई यहीँ रोजगारी सिर्जना गर्ने दिशामा अघि बढ्नुपर्नेमा बल दिएका थिए । 

सम्मेलनका आयोजक तथा युवा उद्यमी मञ्च कोशी प्रदेशका अध्यक्ष मुनान रिजालले कोशीलाई डिजिटल केन्द्रमा रूपान्तरण गर्ने दीर्घकालीन लक्ष्यसहित कार्यक्रम आयोजना गरिएको जानकारी गराए ।