काश्मिरमा इस्लामिक आतंकवादबाट मारिएको हिन्दुहरुप्रति राजा ज्ञानेन्द्रद्वारा समवेदना प्रकट

काठमाडौँ, १३ वैशाख । गत वैशाख ०९ गते भारतको काश्मिर स्थित पहलगाम भन्ने ठाउँमा इस्लामिक आतंककारीहरुले हिन्दुहरुलाई छानी-छानी गोली हानि हत्या गरेको घटनालाई लिएर राजा ज्ञानेन्द्रले आज समवेदना सन्देश प्रकट गरेका छन् ।

उनको समवेदना सन्देश यस्तो छः

''हालै हाम्रो छिमेकी मित्रराष्ट्र भारतको जम्बु-काश्मिर पहलगाममा भएको आतंककारी आक्रमणका कारण धेरै हिन्दुवादी यात्रीहरुको दुःखद निधन भएकोमा हामीलाई अत्यन्त दुःख लागेको छ । यो घटनामा परि ज्यान गुमाएका एक नेपाली सहित सबै दिवंगत आत्माप्रति हाम्रो भावपूर्ण श्रद्धाञ्जली । साथै मृतकजनका सबै शोकसन्तप्त परिवारमा हाम्रो आत्मीय समवेदना । यसैगरी यो दुःखद घडीमा मित्रराष्ट्र भारत सरकारप्रति पनि हामी गहिरो सहानूभूति व्यक्त गर्दछौँ ।

"बसुधैव कुटुम्बकम" को आदर्श अवलम्बन गर्ने सनातनी वैदिक हिन्दु धर्मावलम्बीहरुको दिव्य मानवीय मान्यता हो । त्यो मान्यता विपरित यस प्रकारका जघन्य अपराध गर्नु गराइनु सर्वथा धर्म निषिद्ध पाप कर्म हो भन्ने हामी ठान्दछौँ । सम्पुर्ण विश्वक्षेत्र र समग्र हिन्दु समुदायलाई नै मर्मान्त पार्न भएको यस्तो घटनाको जति निन्दा गरे पनि थोरै हुन्छ । त्यस्तो घटनाको विश्वव्यापी भर्त्सना हुनु पर्दछ र सबैबाट निन्दा गरिनु पर्छ भन्ने हाम्रो धारणा छ ।''