बनेपामा राजसंस्था पक्षधरहरूको प्रदर्शन

काभ्रे: काभ्रे बनेपामा सयौं राजसंस्था पक्षधरहरूले प्रदर्शन गरेका छन् । आज दिउसो मध्यान्ह भएको उक्त प्रदर्शनमा अधिकांश युवा अनुहारहरू थिए। 

छातीमा पुर्व राजाको टाटु नै खोपेर सडकमा होमिएका सन्तोष राजावादी र सतिस राजावादी लगायतले उक्त कार्यक्रमको नेतृत्व गरेका थिए ।

प्रदर्शनमा सहभागी युवाहरूले 'हाम्रो राजा हाम्रो देश प्राण भन्दा प्यारो छ' लगायतका नारा लगाएका थिए।  साथै उनीहरूले बर्तमान व्यवस्था र राजनैतिक नेतृत्व प्रति आक्रोश व्यक्त गरेका थिए । 

आफुलाई राजावादी भनेर परिचय दिने सतिस राजावादी भन्छन "०६२, ६३ मा नयाँ नेपाल बनाउने भनेर हाम्रो बा-आमा र दाई पुस्तालाई सडकमा ल्याएर अहिलेको व्यवस्था ल्याए, तर हामी यहि व्यवस्था फ्यालेर राजासहितको व्यवस्था ल्याउन सडकमा आउन परेको छ।" उनि थप्छन "संघियता, गणतन्त्र र धर्म निरपेक्षको नाममा देशलाई आर्थिक रुपले कंगाल मात्रै बनाईएन देशको भाषा, धर्म-संस्कृति र पहिचानलाई पनि मेटने प्रयास भयो। वास्तवमा अहिलेको व्यवस्था देशलाई बर्बाद गर्न ल्याईएको रहेछ।" उनले भने।

विगत लामो समय देखि राजससंस्था पुनर्स्थापनाको लागि संघर्ष गरिरहेका सन्तोष र सतिश राजावादी लगायत अभियान्ताहरू राजाको फागुन ७ को सम्बोधन पछि आफूहरूको संघर्षले सार्थकता पाउन लागेकोले उत्साहित भएको बताएका छन्।  साथै उनिहरू सबैखाले राजसंस्थावादी दल, समूह र अभियान्ताहरू एकजुट भएर आन्दोलन गर्नुपर्ने र यसमा अन्य राजनैतिक दलहरूलाई पनि सम्झाएर सहमत गराउनु पर्ने तर्क गर्छन।  "सबैजना मिलुन, यसैमा देशको भलो छ", सन्तोष राजावादीले भने।  

पछिल्लो समय देशमा राजससंस्था पुनर्स्थापनाकालागि देशभर विभिन्न कार्यक्रमहरू भैरहेका छन्। पूर्वराजा ज्ञानेन्द्र शाहले गत फागुन ७ गते गरेको आव्हानपछि यस मुद्धाले व्यापक चर्चा पाएको छ।  पूर्वराजाको उक्त सन्देशले सम्पुर्ण राजसंस्था पक्षधरू आन्दोलित बनेका छन्। 

विगत लामो समय देखि सडकमा राजसंस्था पुनर्स्थापनाको नेतृत्व गरिरहेकाहरू यतिबेला वार कि पाराको मनस्थितिमा पुगेको बुझ्न सकिन्छ। विशेषगरी युवाहरूमा पूर्वराजा शाह प्रतिको क्रेज ह्वात्तै बढेको छ । राजनैतिक दलहरू यस आवाजलाई सकेसम्म दवाउने मनस्थितिमा रहेको देख्न सकिन्छ भने केहि प्रमुख नेताहरू यस बारेमा विभिन्न मतमा बाढिएका छन्।