ध्यान मावन जातिको कल्याणका निम्तिः प्रधानमन्त्री ओली

काठमाडौँ, ६ पुसः  प्रधानमन्त्री केपी शर्मा ओलीले ध्यान मावन जातिको कल्याणका निम्ति भएको बताएका छन् । 

विश्व ध्यान दिवसको अवसरमा आज श्रव्यदृश्य माध्यमबाट शुभकामना सन्देश दिदै प्रधानमन्त्री ओलीले यसबाट लाभ लिन सबैलाई आग्रह गरेका छन् ।

संयुक्त राष्ट्र सङ्घले २१ डिसेम्बरलाई ध्यान दिवसका रुपमा मान्यता दिएकामा उनले खुसी व्यक्त गरे । प्रधानमन्त्रीले शुभकामना सन्देशमा भनेका छन्,  “यस अवसरमा म खुसी व्यक्त गर्न चाहन्छु । सबैमा बधाई भन्न चाहन्छु । शुभकामना भन्न चाहन्छु । यस ध्यान दिवसको हामी सबैले सदुपयोग गरौँ । यसबाट लाभ लिऔँ ।”

ध्यान मावन जातिको कल्याणका निम्ति भएको बताउदै प्रधानमन्त्रीले वर्सेनी यस दिवसलाई मनाउँदै जान अनुरोधसमेत गरेका छन् । “वर्षमा एक पल्ट २१ डिसेम्बरमा मात्रै होइन, ध्यानलाई आफ्नो दिनचर्याको अभिन्न अङ्गका रुपमा अपनाऔँ”, उनले भने । 

मानव जाति शारीरिक र मानसिक हिसाबले सधैँ स्वस्थ रहनुपर्ने उल्लेख गर्दै प्रधानमन्त्रीले अरुलाई पनि स्वस्थ रहन सहयोग पु-याउनुपर्ने बताएका छन् ।  

साथै प्रधानमन्त्री ओलीले सामाजिक संजालमा भगवान शिवको तस्विर सहित लेखेका छन् "आज अन्तर्राष्ट्रिय ध्यान दिवस । यस दिनलाई प्राचीन कालमा शिवले सप्तऋषिहरुलाई योगका बारेमा बताएको दिनका रूपमा लिइन्छ। संयुक्त राष्ट्रसंघले समेत ध्यान दिवसका रूपमा मनाउने निर्णय गरेपछि डिसेम्बर २१ लाई अन्तर्राष्ट्रिय ध्यान दिवस मनाउन थालिएको थियो । आज वर्षकै सबैभन्दा छोटो दिन हो । खगोल विज्ञानले यसलाई शीतकालीन अयनान्त भन्ने गरेको छ। भोलिदेखि क्रमैसँग दिनहरू लामा र रातहरु छोटा हुँदै जान्छन्। योगलाई जीवनशैली बनाएर शारीरिक र मानसिक स्वास्थ्य दुवैलाई सबल बनाऔं !
सबैलाई ध्यान दिवसको शुभकामना !"