एसिसी यू-१९ एसियाकप: पहिलो खेलमा नेपाल श्रीलंकासँग भिड्दै

काठमाडौँ- एसिसी यु-१९ एसिया कप क्रिकेटमा नेपालले शुक्रबार श्रीलंकाको सामना गर्दैछ।

संयुक्त अरब इमिरेट्स (युएई) मा सुरु हुन लागेको प्रतियोगिताको पहिलो खेल बिहान १०:४५ मा सुरु हुनेछ। आजै सोही समयमा अफगानिस्तान र बंगलादेशबिच पनि प्रतिस्पर्धा हुँदैछ।

नेपाल क्रिकेट संघ क्यानले हेमन्त धामीको कप्तानीमा १५ सदस्यीय टोलीलाई युएई पठाएको छ। यु-१९ टिमको प्रमुख प्रशिक्षक शक्ति गौचन रहँदा सहायक प्रशिक्षकको जिम्मेवारी धिरेन्द्र चन्दलाई दिइएको छ।

आठ देश सहभागी एसिया कपमा नेपाल समूह ‘बी’ मा छ। नेपालको समूहमा अफगानिस्तान, बङ्गलादेश र श्रीलङ्का छन्। समूह ‘ए’ मा आयोजक युएई, भारत, पाकिस्तान र जापान रहेका छन्।

नेपालले दोस्रो खेल मंसिर १६ गते आइतबार बंगलादेशसँग खेल्ने छ। समूह चरणको अन्तिम खेलमा नेपालले मंसिर १८ गते मंगलबार अफगानिस्तानसँग प्रतिस्पर्धा गर्नेछ। प्रतियोगिताको सेमिफाइनल मङ्सिर २१ र फाइनल खेल २३ गते हुँदैछ।