दार्चुला जीप दुर्घटना: ८ जनाको मृत्यु, ५ जनाको अवस्था गम्भीर

खलंगा- दार्चुलामा जीप दुर्घटना हुँदा आठ जनाको घटनास्थलमा नै मृत्यु भएको छ भने अन्य ५ जना गम्भीर घाइते भएका छन् ।

राजमार्ग सुरक्षा तथा प्रदेश ट्राफिक प्रहरी कार्यालय अत्तरिया कैलालीका प्रमुख प्रहरी उपरीक्षक राजिव बस्नेतका अनुसार दार्चुलाको शैल्यशिखर नगरपालिका- ५ लेकगाउँका ३० वर्षीय वीरेन्द्र रावल, सोही ठाउँका २८ वर्षीय शान्ति रावल, शैल्यशिखर- ९ नकतडका ४५ वर्षीय दिलीप विष्ट, बैतडीको डिलाशैनी- ५ का १५ वर्षीय सञ्जीव बोहरा, भारतको उत्तर प्रदेश विजनौर जिल्लाका ४५ वर्षीय मोहमद सफिर र सोही जिल्लाका १८ वर्षीय मोहमद बसिमको मृत्यु भएको हो ।

दुई जनाको भने परिचय खुलेको छैन ।

दुर्घटनामा घाइते भएका अन्य पाँच जनाको अवस्था पनि गम्भीर रहेको प्रहरीले जनाएको छ।