विविध विषयमा छलफल गर्न रास्वपा केन्द्रीय समिति बैठक बस्दै

काठमाडौँ । विविध विषयमा छलफल गर्न रास्वपाले केन्द्रीय समितिको बैठक बोलाउँदै छ । कार्यवाहक प्रवक्ता मनिष झाले जानकारी दिए अनुसार शनिबार बिहान ११ः३० बजे पार्टी कार्यालय वनस्थलीमा बैठक बस्दैछ ।

झाका अनुसार पाँच कार्यसूचीमा छलफल गर्न केन्द्रीय समिति बैठक बस्न लागेको हो । समसामयिक राजनीतिक गतिविधि, पार्टीको सांगठनिक गतिविधि, आगामी राजनीतिक सहकार्यका न्यूनतम मुद्दाहरू र सङ्घर्षको मोडालिटीबारे, मंसिर १६ गते हुने स्थानीय तह उपनिर्वाचनमा पार्टी परिचालन र विविध प्रस्तावमाथि छलफल हुने बताए ।

पार्टी सभापति रवि लामिछाने गत कात्तिक २ गतेदेखि कास्की प्रहरी हिरासतमा छन् । उनी विरुद्द सहकारी ठगी, संगठित अपराधको अभियोगमा मुद्दा चल्दै छ । उनीमाथि तेस्रोपटक अदालतबाट म्याद थप गरी प्रहरीले अनुसन्धान गरिरहेको छ ।

यस्ता विविध विषयमा केन्द्रीय समिति बैठकले व्यापक छलफल गरेर संघर्षको कार्यक्रम तय गर्न लागेको हो ।