उत्तरी छिमेक भ्रमण तयारीमा प्रधानमन्त्री ओली

काठमाडौँ । यहि कार्त्तिकको अन्तिम साता वा मंसिरको पहिलो हप्ता प्रधानमन्त्री केपी शर्मा ओलीको चीन भ्रमण हुनसक्ने भएको छ । त्यही अनुरुप तयारी थालिएको प्रधानमन्त्री सचिवालयले जनाएको छ । परराष्ट्र मन्त्रालय र विकास योजनासँग सम्बन्धित मन्त्री तथा सचिव डाकेर चीनसँगका सम्झौताको प्रगतिबारे अद्यावधिक गर्न निर्देशन दिइएको स्रोतले बतायो ।

बिआरआई समझदारी सन् २०१७ मै भएको हो । तर पनि कार्यान्वयनमा एकदमै ढिलासुस्ती भएको भन्दै चीनियाँ पक्षले चासो देखाइरहेको छ । त्यसैले प्रम केपी ओलीले बिआरआई सम्बन्धी कार्य प्रगतीबारे चाख दिएका हुन् ।

सामान्यतयाः हाम्रो देशको प्रधानमन्त्री सर्वप्रथम दक्षिणीको छिमेक भ्रमण गर्ने प्रचलन छ । प्रधानमन्त्री ओली पछिल्लो समय राष्ट्रसंघ महासभामा भाग लिने क्रममा अमेरिकामा भारतीय प्रधानमन्त्री नरेन्द्र मोदीसँग साइडलाइन भेट गरे पनि सौहार्दता र विश्वसनियता विकास हुन नसकेको बताइन्छ । भारतबाट भ्रमण निम्तो झिकाउन कुटनीतिक च्यानल पनि प्रयोग गरिएको भनिन्छ तर अहिलेसम्म भारतबाट प्रधानमन्त्री केपी वलीलाई भ्रमण निम्तो नआएको भन्ने छ । यसै सेरोफेरोमा उनले चीन भ्रमण तयार गरेका छन् ।

उक्त भ्रमण चीनसङ्गको आर्थिक विकास फ्रेमवर्क बीआरआई, ऊर्जा तथा व्यापार लगायत विषयमा छलफल हुन सक्ने बालुवाटार स्रोतको भनाइ छ ।