भीम रावल, विन्दा पाण्डे र उषाकिरण तिम्सिनालाई एमालेले स्पष्टीकरण सोध्ने

काठमाडौँ - आइतबार बसेको एमाले सचिवालय बैठकले नेता रावल तथा स्थायी कमिटी सदस्य पाण्डे र केन्द्रीय सदस्य तिम्सिनालाई स्पष्टीकरण सोध्ने निर्णय गरेको महासचिव शंकर पोखरलले जानकारी दिए । उनीहरुले पार्टी निर्णयविपरीत बोलेको भन्दै एमालेले स्पष्टीकरण सोध्न लागेको हो ।

पोखरेलले भने, ‘आजको सचिवालय बैठकले पार्टी निर्णयविरुद्ध सार्वजनिक अभिव्यक्ति दिने र अस्वस्थ गतिविधि गर्नेहरुलाई स्पष्टीकरण सोध्ने निर्णय गरेको छ। एकता र अनुशासन पार्टीको बल हो । सबै जना जिम्मेवार र अनुशासित बनौँ।’ ‘उहाँले दान गर्ने कुरा गर्नुभएको छ । दानको प्रक्रियामा रहेकाले यसलाई हामी कानूनी प्रक्रियाद्वारा समाधान गछौं’, पोखरेलले भने ।

उनीहरुले भाटभटेनीका सञ्चालक व्यवसायी मीनबहादुर गुरुङले १० रोपनीभन्दा बढी जग्गा दिएर एमाले पार्टी कार्यालयको भवन बनाइदिन लागेको विषयमा विरोध जनाएका थिए । पूर्व उपाध्यक्ष रावललाई भने पार्टीको निर्णयप्रति लामो समयदेखि फरक मत राख्दै आएकाले पनि स्पष्टीकरण सोध्ने निर्णय गरेको हो ।