उत्तर कोरियाद्वारा हाइपरसोनिक क्षेप्यास्त्र परीक्षण

काठमाडौँ ; उत्तर कोरियाले नयाँ हतियार प्रणालीको परीक्षण गरेको छ । सरकारी समाचार संस्था केसीएनएका अनुसार परीक्षणमा ह्वासोङ–११ एमए नामको हाइपरसोनिक क्षेप्यास्त्र प्रयोग गरिएको थियो । उत्तर कोरियाली नेता किम जोङ उन छोरीसहित परीक्षण अवलोकन गर्न पुगेका थिए ।

किमले नयाँ हतियारको विकासले देशको युद्ध तयारी थप मजबुत बनाउने र शत्रुका लागि ठूलो चुनौती सिर्जना गर्ने बताएका छन् । दक्षिण कोरियाली सेनाका अनुसार उत्तर कोरियाले पूर्वी तटको वोनसान क्षेत्रबाट करिब तीन घण्टाको अन्तरमा दुई छोटो दूरीका क्षेप्यास्त्र प्रहार गरेको थियो। ती क्षेप्यास्त्र करिब ४५० र ६०० किलोमिटर टाढासम्म पुगेका थिए ।

उत्तर कोरियाले यसअघि ह्वासोङ–११ एमएलाई हाइपरसोनिक हतियारका रूपमा दाबी गर्दै आएको छ । आवाजको गतिभन्दा पाँच गुणाभन्दा बढी गतिमा उड्न सक्ने हाइपरसोनिक क्षेप्यास्त्रले उडानका क्रममा दिशा परिवर्तन गर्न सक्ने भएकाले त्यसलाई पहिचान र रोक्न कठिन हुने बताइन्छ । यद्यपि, उत्तर कोरियाका हाइपरसोनिक क्षेप्यास्त्रसम्बन्धी दाबीमा दक्षिण कोरिया र विज्ञहरूले प्रश्न उठाउँदै आएका छन् ।

उत्तर कोरियाले पछिल्लो समय क्षेप्यास्त्र र आणविक हतियारको विकासलाई तीव्रता दिइरहेको छ । स्टकहोम अन्तर्राष्ट्रिय शान्ति अनुसन्धान संस्थानको सन् २०२६ को अनुमानअनुसार उत्तर कोरियासँग करिब ६० आणविक हतियार छन् । उत्तर कोरियासँग छोटो दूरीका क्षेप्यास्त्रदेखि अमेरिकासम्म पुग्न सक्ने क्षमताका ह्वासोङ–१७ र ह्वासोङ–१८ जस्ता अन्तरमहादेशीय क्षेप्यास्त्रसमेत रहेका छन् ।