- भारतको रिलायन्स समूहअन्तर्गतको जियो प्लेटफर्म्सको प्राथमिक सेयर निष्कासनमा लगानीकर्ताको अभूतपूर्व आकर्षण देखिएको छ ।
काठमाडौँ : भारतको रिलायन्स समूहअन्तर्गतको जियो प्लेटफर्म्सको प्राथमिक सेयर निष्कासनमा लगानीकर्ताको अभूतपूर्व आकर्षण देखिएको छ ।
कम्पनीको आईपीओमा करिब १ करोड ३९ लाख आवेदन परेको छ भने कुल माग ७ लाख ४० हजार करोड भारु अर्थात् ७.४ लाख करोड भारुभन्दा बढी पुगेको छ ।
अक्टोबर २१ देखि २३ सम्म खुलेको आईपीओमा उपलब्ध सेयरको तुलनामा २२.१९ गुणा बढी आवेदन परेको थियो । सार्वजनिक निष्कासनअन्तर्गत मात्रै ४.९ लाख करोड भारुभन्दा बढीको आवेदन परेको छ । आईपीओ खुलेको करिब १०० मिनेटमै पूर्ण आवेदन प्राप्त हुनु पनि भारतीय सेयर बजारको ठूलो निष्कासनमा नयाँ कीर्तिमान बनेको छ ।
आईपीओमा संस्थागत लगानीकर्ताको आकर्षण सबैभन्दा बढी देखिएको छ । योग्य संस्थागत लगानीकर्ताको समूहमा उपलब्ध सेयरको तुलनामा करिब ७०.५५ गुणा आवेदन परेको छ । गैरसंस्थागत लगानीकर्ताको समूहमा १४ गुणा र सर्वसाधारणका लागि छुट्याइएको सेयरमा २.७२ गुणा आवेदन परेको छ ।
जियो प्लेटफर्म्सले आईपीओमार्फत ३० हजार २१३ करोड भारु जुटाउने लक्ष्य राखेको छ । प्रतिकित्ता १ हजार ६५ देखि १ हजार ११९ भारु मूल्य तोकिएको निष्कासनबाट प्राप्त रकमको ठूलो हिस्सा सहायक कम्पनी रिलायन्स जियो इन्फोकमको ऋण भुक्तानीमा प्रयोग गर्ने योजना छ ।
आईपीओको माथिल्लो मूल्यका आधारमा जियो प्लेटफर्म्सको मूल्याङ्कन करिब १०.८ लाख करोड भारु पुगेको छ । कम्पनीको सेयर अक्टोबर २८ मा भारतीय सेयर बजारमा सूचीकृत हुने अपेक्षा गरिएको छ । दूरसञ्चारसँगै डिजिटल सेवा, कृत्रिम बुद्धिमत्ता र क्लाउड प्रविधिमा विस्तार गर्ने जियोको योजनालाई पनि लगानीकर्ताको आकर्षणको एउटा कारण मानिएको छ ।
सहयोग गर्नुहोस्
निष्पक्ष, खोजमुलक तथा तथ्यमा आधारित पत्रकारिताको लागी हामीलाई सहयोग गर्न सक्नुहुनेछ। तपाइको सानो प्रयासले हाम्रो जवाफदेही पत्रकारितामा ठुलो सहयोग हुनसक्छ।
सहयोग गर्नुहोस्ताजा समाचार
धेरै पढिएको
विशेष
आस्था, इतिहास र संस्कृतिको संगम : हुति गाउँको अनौठो हरिणजात्रा !
हिमालको काख, महाकालीको तट र पुस्तौँदेखि हस्तान्तरण हुँदै आएको धार्मिक आस्थाको जगमा उभिएको एउटा अद्भुत सांस्कृतिक परम्परा हरिण जात्रा सुदुरको परिचय हो।
