इरानले होर्मुज खुलेको घोषणा गरेपछि कच्चा तेलको मुल्य घट्यो

काठमाडौँ: इरानले होर्मुज जलडमरू पूर्ण रूपमा खुला गर्ने घोषणा गरेपछि विश्व बजारमा कच्चा तेलको मूल्यमा ठूलो गिरावट आएको छ । शुक्रबार एकैदिन १० प्रतिशतभन्दा बढीले मूल्य घटेपछि अन्तर्राष्ट्रिय बजारमा खरिद–बिक्री गतिविधि पुनः सक्रिय भएको छ ।

यो निर्णयसँगै फारसको खाडी क्षेत्रबाट तेल बोक्ने ट्यांकरहरूको आवतजावत फेरि सुरु भएको छ । यसले विश्वभर कच्चा तेल आपूर्ति सहज हुने अपेक्षा गरिएको छ । आपूर्ति सामान्य बन्दै जानु र भू–राजनीतिक तनाव केही कम हुने संकेतका कारण अमेरिकी सेयर बजार पनि उकालो लाग्न थालेको छ ।

अमेरिका र इरानबीच तनाव कायम रहे पनि विश्व अर्थतन्त्र सबैभन्दा खराब अवस्थाबाट जोगिन सक्ने आशा बढेको देखिएको छ । यसको प्रत्यक्ष प्रभाव ऊर्जा बजारमा परेको छ । अमेरिकी मापदण्डको कच्चा तेलको मूल्य करिब १० दशमलव ८ प्रतिशत घटेर प्रतिव्यारेल ८१. २८ डलरमा झरेको छ । त्यस्तै अन्तर्राष्ट्रिय मापदण्डको ब्रेन्ट कच्चा तेल पनि १०.३ प्रतिशतले घटेर ८९.१३ डलरमा पुगेको छ । यद्यपि, यो मूल्य अझै युद्धअघिको स्तरभन्दा माथि रहेकोले बजारमा केही सतर्कता कायम रहेको देखिन्छ ।

उता अमेरिकी सेयर बजारमा पनि लगातार वृद्धि देखिएको छ । प्रमुख सूचकहरू उकालो लागेका छन् भने पछिल्लो केही सातायता बजारमा उल्लेख्य सुधार आएको छ ।

यसैबीच, कच्चा तेलको मूल्य घटेसँगै मुद्रास्फीति दबाब कम भएको छ । यसको असर बन्ड बजारमा पनि देखिएको छ, जहाँ दीर्घकालीन ब्याजदर घटेको छ ।

होर्मुज जलडमरू खुला हुनु विश्व अर्थतन्त्रका लागि सकारात्मक संकेतका रूपमा हेरिएको छ । तर, बजारको दीर्घकालीन स्थिरता भने युद्धको अन्त्य र ऊर्जा आपूर्तिको निरन्तरतामा निर्भर रहने विश्लेषण गरिएको छ ।