५५ वर्षपछि सिद्धार्थ राजमार्गको मुहार फेरिँदै : स्तरोन्नतिका लागि एआइआइबीले दियो अनुदान

५५ वर्षअघि निर्माण भएको सिद्धार्थ राजमार्ग (पोखरा–बुटवल खण्ड) अब ‘डेडिकेटेड डबल लेन’मा स्तरोन्नति हुने भएको छ। यस परियोजनाका लागि एसियाली पूर्वाधार लगानी बैंक (एआइआइबी) ले २० लाख डलर (करिब २६ करोड रुपैयाँ) अनुदान सहयोग उपलब्ध गराएको छ।

गत ८ माघमा बसेको मन्त्रिपरिषद् बैठकले उक्त अनुदान स्वीकार गर्ने निर्णय गरेसँगै सडक विभागले विस्तृत परियोजना प्रतिवेदन (डिपिआर) तयार पार्ने प्रक्रिया अघि बढाएको छ। डिपिआर तयार भएपछि निर्माण कार्यका लागि एआइआइबीले नै ऋण लगानी गर्ने गरी समानान्तर छलफल भइरहेको छ। सन् १९७१ मा निर्माण सम्पन्न भएको यो राजमार्ग हाल ५.५ देखि ६ मिटर मात्र चौडा छ, जसका कारण बढ्दो सवारी चाप व्यवस्थापन चुनौतीपूर्ण बनेको छ।

नयाँ योजनाअनुसार १५८ किलोमिटर लामो यो खण्डलाई अत्याधुनिक बनाइनेछ। पहाडी भूभागको घुम्ती कम गरी सडकको लम्बाइ छोट्याउन विभिन्न स्थानमा साना सुरुङमार्ग र ३८ वटासम्म ‘भायाडक्ट’ (पुलजस्तो संरचना) निर्माण गर्ने प्रस्ताव गरिएको छ। यसअघि २०१७ मा विश्व बैंकको सहयोगमा डिपिआर बने पनि लगानी नजुट्दा काम अघि बढ्न सकेको थिएन।

पश्चिम नेपालको व्यापार, पर्यटन र आर्थिक गतिविधिका लागि मेरुदण्ड मानिने यो राजमार्गको स्तरोन्नतिले समग्र क्षेत्रको विकासमा ठूलो टेवा पुग्ने अपेक्षा गरिएको छ। सडक विभागले एआइआइबीसँग वित्तीय सहकार्य गर्न लागेको यो पहिलो पटक हो।