अन्तरिम सरकारलाई नीतिगत सुधार गर्ने अवसर छ: अध्यक्ष ढकाल

नेपाल उद्योग वाणिज्य महासंघका अध्यक्ष चन्द्रप्रसाद ढकालले सुशीला कार्की नेतृत्वको वर्तमान अन्तरिम सरकारलाई देशको आर्थिक एवं नीतिगत सुधार गर्ने सुनौलो अवसर रहेको बताएका छन्।

अन्तर्राष्ट्रिय भन्सार दिवसका अवसरमा काठमाडौँमा आयोजित एक कार्यक्रममा बोल्दै अध्यक्ष ढकालले दलीय सरकारको तुलनामा गैरदलीय (अन्तरिम) सरकारले दृढताका साथ नीतिगत परिवर्तन गर्न सक्ने धारणा राखे। "विगतमा दलीय सरकारहरूमा हुने राजनीतिक खिचातानीका कारण महत्त्वपूर्ण नीतिगत निर्णयहरू समयमै हुन सकेनन्," ढकालले भने, "अहिलेको सरकारलाई त्यस्तो दबाब नभएकाले सुधारका लागि यो सही समय हो।"

उनले अन्तरिम सरकारका अर्थमन्त्री डा. रामेश्वर खनालको कार्यशैलीको प्रशंसा गर्दै उनको नेतृत्वमा सकारात्मक काम भइरहेको समेत बताए। यसै क्रममा ढकालले भन्सार राजस्व संकलन गर्दा उद्यमशीलताको विकासमा बाधा नपुग्ने गरी नीति बनाउन सरकारलाई आग्रह गरे। साथै, होटल र पर्यटन क्षेत्रलाई सरकारले उद्योगको मान्यता दिए पनि व्यवहारमा उद्योगहरूले पाउने सरहको सुविधा प्राप्त हुन नसकेको भन्दै उनले सरकारको ध्यानाकर्षण गराए।