नागढुंगा सुरुङमार्ग सञ्चालनका लागि १० कम्पनीको प्रतिस्पर्धा: चैतभित्र परीक्षण सुरु गर्ने तयारी

काठमाडौं: नागढुंगा–सिस्नेखोला सुरुङमार्ग सञ्चालन र व्यवस्थापनका लागि १० वटा सेवा प्रदायक कम्पनीले बोलपत्र पेस गरेका छन् । आयोजनाका अनुसार हाल सहभागी कम्पनीहरूको प्राविधिक मूल्यांकन भइरहेको छ, जुन १५ माघभित्र सकिनेछ ।

आयोजना निर्देशक सौजन्य नेपालले १५ फागुनभित्र आर्थिक प्रस्तावको मूल्यांकन सकेर फागुन अन्तिमसम्ममा छानिएको कम्पनीसँग सम्झौता गरिने बताए । "सम्झौता भएलगत्तै जनशक्तिलाई तालिम दिएर चैतभित्र परीक्षणका रूपमा सुरुङ सञ्चालन गर्ने हाम्रो तयारी छ," उनले भने ।

प्रतिस्पर्धामा सहभागी १० विदेशी कम्पनीहरूमा ६ चिनियाँ, ३ भारतीय र १ टर्किस छन् । यी सबैले नेपाली कम्पनीसँग अनिवार्य ‘जोइन्ट भेन्चर’ (JV) गरेका छन् । छानिने कम्पनीले ५ वर्षसम्म सुरुङको मर्मत, ट्राफिक व्यवस्थापन, उद्धार र टोल संकलनको जिम्मा पाउनेछन् । यसका लागि करिब १५० कर्मचारी परिचालन गरिनेछ । संकलित टोल रकम सडक बोर्ड नेपालको खातामा जम्मा हुनेछ ।

सडक विभागका महानिर्देशक विजय जैसीका अनुसार सुरुङ निर्माणको ९८ प्रतिशत काम सम्पन्न भइसकेको छ । अब टोल प्लाजा निर्माण र धादिङतर्फको पहिरो व्यवस्थापन मात्र बाँकी छ । पहिरो रोकथाम र अन्य खर्चका लागि जापान सरकार (जाइका) सँग थप ५.५ अर्ब रुपैयाँ ऋण लिने प्रक्रिया अन्तिम चरणमा पुगेको छ । यो रकम थपिएपछि सुरुङ निर्माणमा जापानको कुल ऋण साढे २१ अर्ब रुपैयाँ पुग्नेछ ।

सञ्चालन निर्देशिका अनुसार सुरुङमा पैदल यात्री, दुईपांग्रे, तीनपांग्रे र प्रज्वलनशील पदार्थ बोकेका सवारी साधनलाई प्रवेश निषेध गरिएको छ । सुरुङ सञ्चालनमा आएपछि मालवाहक सवारीको ३० देखि ३५ मिनेट समय बचत हुनेछ । जापानी कम्पनी हाज्मा एन्डो कर्पोरेसनले निर्माण गरिरहेको यस सुरुङको मुख्य लम्बाइ २,६८८ मिटर छ ।