नेपालको सार्वजनिक ऋण २८ खर्ब नाघ्यो

नेपालको सार्वजनिक ऋण २८ खर्ब ६ अर्ब ३९ करोड रुपैयाँ पुगेको छ। चालु आर्थिक वर्ष २०८२/८३ को पहिलो ६ महिनामा १ खर्ब ३२ अर्ब ३४ करोड ऋण थपिँदा कुल ऋण भार कुल गार्हस्थ्य उत्पादन (जीडीपी) को ४५.९५ प्रतिशत पुगेको हो।

सार्वजनिक ऋण व्यवस्थापन कार्यालयका अनुसार कुल ऋणमा वैदेशिक हिस्सा ५३ प्रतिशत (१४ खर्ब ८७ अर्ब २६ करोड) र आन्तरिक हिस्सा ४७ प्रतिशत (१३ खर्ब १९ अर्ब १३ करोड) छ। जीडीपीको अनुपातमा आन्तरिक ऋण २१.६० र बाह्य ऋण २४.३५ प्रतिशत रहेको छ।

सरकारले चालु आवमा ५ खर्ब ९५ अर्ब रुपैयाँ ऋण उठाउने लक्ष्य राखेकोमा पुस मसान्तसम्म २ खर्ब १४ अर्ब ५५ करोड (३६.०२ प्रतिशत) प्राप्त गरेको छ। यस अवधिमा संकलित ऋणमा आन्तरिकको हिस्सा ८२.८१ र बाह्यको १७.१९ प्रतिशत छ। ३ खर्ब ६२ अर्ब आन्तरिक ऋणको लक्ष्यमा १ खर्ब ७७ अर्ब ६६ करोड र २ खर्ब ३३ अर्ब बाह्य ऋणको लक्ष्यमा ३६ अर्ब ८९ करोड मात्र संकलन भएको छ।

ऋणको साँवा-ब्याज भुक्तानीमा ६ महिनामा १ खर्ब ८७ अर्ब १२ करोड खर्च भएको छ। सरकारले यस वर्षका लागि ४ खर्ब ११ अर्ब १ करोड विनियोजन गरेको थियो। भुक्तानीमध्ये आन्तरिकतर्फ १ खर्ब ५५ अर्ब र बाह्यतर्फ ३१ अर्ब ९९ करोड खर्च भएको छ। कुल भुक्तानीमा १ खर्ब ५२ अर्ब ८९ करोड साँवा र ३४ अर्ब २३ करोड रुपैयाँ ब्याज रहेको कार्यालयले जनाएको छ।