सिन्धुली एसबीआई बैंक लुटपाट: मुख्य योजनाकार घरबेटीसहित ७ जना पक्राउ

सिन्धुली: सिन्धुलीको घ्याङलेख गाउँपालिका–२ स्थित नेपाल एसबीआई बैंकमा भएको करोडौँको लुटपाट महिनौँ लामो योजनापछि गरिएको खुलेको छ । 

जिल्ला प्रहरी कार्यालय सिन्धुलीका एसपी लालध्वज सुवेदीका अनुसार यस लुटपाटको षड्यन्त्र २०८२ असोजदेखि नै बुनिएको थियो । पटक–पटकका असफल प्रयासपछि पुस २९ गते यो समूह लुटपाट गर्न सफल भएको थियो ।

यसरी भयो लुटपाट
पुस २९ गते साँझ ७:३० बजे ५ जनाको समूह बैंकभित्र प्रवेश गरी सुरक्षा गार्ड र कर्मचारीलाई खुकुरी देखाई नियन्त्रणमा लिएका थिए । कर्मचारीहरूलाई हात–खुट्टा बाँधेर बन्धक बनाएपछि लुटेराले प्लास्टिकको नक्कली पेस्तोल देखाई बैंकको मुख्य भल्टबाट ३ करोड ७ लाख रुपैयाँ बोरामा भरेर फरार भएका थिए । यसअघि पुस २३ र २८ गते पनि लुटपाटको प्रयास भए पनि उनीहरू सफल हुन सकेका थिएनन् ।

प्रहरीको अपरेसन र रकम बरामद
सूचना पाएलगत्तै एसपी सुवेदीको नेतृत्वमा ५० जनाको टोली परिचालन भएको थियो । प्रहरीले घटनास्थल नजिकैबाट टाटा सुमो चालक भगवत सिंह थापालाई नियन्त्रणमा लिएपछि अनुसन्धानले गति लिएको थियो । रातभरको सर्च अपरेसनका क्रममा जंगलमा लुकाइएको १ करोड ८ लाख रुपैयाँ सोही राति फेला पर्यो । भोलिपल्ट स्थानीयको सहयोगमा थप ४ जना पक्राउ परे र उनीहरूको बयानका आधारमा थप रकम बरामद भयो । हालसम्म कुल २ करोड ६८ लाख ५५ हजार १७५ रुपैयाँ बरामद भइसकेको प्रहरीले जनाएको छ ।

घरधनी नै मुख्य योजनाकार
प्रहरीको प्राविधिक विश्लेषण र बयानका आधारमा बैंक रहेको घरका धनी छविलाल स्याङ्तान नै घटनाको मुख्य योजनाकार रहेको खुलेको छ । उनले नै समूहलाई हतियार, सूचना र निर्देशन उपलब्ध गराएका थिए । प्रहरीले स्याङ्तान र उनका जेठान चतुरमान बज्युसहित ७ जनालाई पक्राउ गरी सार्वजनिक गरेको छ ।

पक्राउ परेका अभियुक्तहरू
पक्राउ पर्नेमा चालक भगवत सिंह थापा, चतुरमान बज्यु, सशांक श्रेष्ठ, निरन गिरी, विवेक थापा, घरधनी छविलाल स्याङ्तान र एक किशोर रहेका छन् । उनीहरूको साथबाट खुकुरी, नक्कली पेस्तोल, नकाब र मोबाइलहरू बरामद गरिएको छ । अदालतबाट ५ दिनको म्याद थप गरी घटनाबारे थप सूक्ष्म अनुसन्धान भइरहेको एसपी सुवेदीले जानकारी दिएका छन् ।