बुटवल–लमही ४०० केभी प्रसारण लाइनको वातावरणीय अध्ययन सुरु

नेपाल विद्युत् प्राधिकरणले बुटवल–लमही ४०० केभी प्रसारण लाइन आयोजनाको प्रारम्भिक वातावरणीय अध्ययन (आइइई) प्रतिवेदन तयार पार्न लागेको छ। यसका लागि प्राधिकरणको सहायक कम्पनी एनइए इन्जिनियरिङले परामर्शदाताको रूपमा काम गरिरहेको छ।

लुम्बिनी प्रदेशका नवलपरासी (पश्चिम), रुपन्देही, पाल्पा, कपिलवस्तु, अर्घाखाँची र दाङ जिल्ला भएर जाने यस प्रसारण लाइनको लम्बाई १६१ किलोमिटर रहनेछ। आयोजनाको क्षेत्राधिकार (राइट अफ वे) ४६ मिटर प्रस्ताव गरिएको छ भने यसअन्तर्गत ४०५ वटा टावर र दाङको लमहीमा ठूलो क्षमताको सबस्टेसन निर्माण हुनेछ।

प्राधिकरणले बिहीबार सूचना जारी गर्दै आयोजनाबाट प्रभावित क्षेत्रको प्राकृतिक, सामाजिक तथा आर्थिक प्रणालीमा पर्न सक्ने प्रभावबारे ७ दिनभित्र लिखित राय–सुझाव दिन सरोकारवालाहरूलाई आह्वान गरेको छ।